സ്വാതന്ത്ര്യദിനാശംസകൾ

അറുപത്തിയെട്ട് സംവത്സരങ്ങൾ,

സ്വാതന്ത്ര്യമനുഭവിച്ചവൾ  - എന്ടെ രാജ്യം.

അതിനുമുൻപവൾ സർവ്വൈശ്വര്യ

ദായകയായി, സമൃദ്ധിയുടെ രാജ്ഞിയായി

വാണിരുന്നവൾ  -  എന്ടെ രാജ്യം.

അവളെ ബലാൽക്കാരമായി പിടിച്ചടുക്കി

അവളെ കൊള്ളയടിച്ചവർ ആരുമായിക്കൊള്ളട്ടെ .

പിന്നീട് പിടിച്ചു വാങ്ങിയ മാനം;

സ്വാതന്ത്ര്യം,  ഒരു അർദ്ധരാത്രിക്ക്

മുദ്ര വച്ച് സ്വീകരിച്ചപ്പോൾ,  നെടുവീർപ്പിട്ടു.

ഇനിയവൾ ശക്ത , സ്വതന്ത്ര  - എന്ടെ രാജ്യം.

തോറ്റോടിയവണ്ടെ മുഖം രക്ഷിക്കാൻ

അവൻ വിതറിയ വിഷവിത്തുകൾ

ഇന്നും പേറി - തമ്മിലടിക്കുന്ന മക്കളുള്ളവൾ,

ജാതിയുടേയും വർഗ്ഗീയതയുടെയും രാഷ്ട്രീയത്തിന്റെയും

വരമ്പുകൾ കൽപിച്ച് - പോരടിക്കുന്ന മക്കളുള്ളവൾ,

ഓരോ ലഹളയുടെയും പേരിൽ മാറിൽ

രക്തക്കച്ച അണിഞ്ഞവൾ - എന്ടെ രാജ്യം.

ഏറ്റം ധനികനും ഏറ്റം ദരിദ്രനും

ഒരുപോലെ അമ്മയിവൾ.

സമ്പത്തിന്റെയും നീതിനിഷേധത്തിന്റെയും

വ്യവഹാരാപഹരണത്തിന്റെയും മൂല്യച്യുതിയുടേയും

അന്തരം പേറി, മക്കൾ നെട്ടോട്ടമോടുമ്പോൾ,

അവരുടെ ചൂഷകരായ ദൈവമനുഷ്യരേയും

കപടസന്ന്യാസികളെയും രാഷ്ട്രീയകോമരങ്ങളേയും

കണ്ട്,  ഗദ്ഗദങ്ങൾ വിഴുങ്ങി  -  എന്ടെ രാജ്യം.

ഞാൻ കട്ടത് നീയും നീ കട്ടത് ഞാനും

മറന്ന്, പുതിയ കർമ്മമേഖലകളിലേയ്ക്ക്

പ്രവേശിക്കുമ്പോൾ - ഐക്യമത്യം മഹാബലം!!

പെണ്മക്കളുടെ മാനത്തിനു വിലയിടിഞ്ഞതിനെ

ഞാനടക്കമുള്ളവർ അടുക്കളയിലും പിന്നാമ്പുറങ്ങളിലും

ഘോരഘോരം വാഗ്ധോരണികൾ മുഴക്കുന്നു .

വീഞ്ഞുനുരയുന്ന ചഷകങ്ങൾക്ക് മുന്നിൽ

രാജ്യപുരോഗതിയെ വിമർശിക്കുന്നു ചിലർ.

എല്ലാം കണ്ട് ഉൾപുളകിയതായി - എന്ടെ രാജ്യം.

വരൂ, നമുക്ക് സ്വാതന്ത്ര്യദിനം ആശംസിക്കാം

മുഖപുസ്തത്തിലും പൊതുമാധ്യങ്ങളിലും

നിറയട്ടെ, ത്രിവർണ്ണപതാകയും ആശംസകളും

ഓരോ ഭാരതീയനും രാജ്യസ്നേഹത്താൽ

രക്തം തിളക്കാൻ,  ഇനിയൊരു ക്രിക്കറ്റ് മത്സരമോ

ജനുവരി ഇരുപത്തിയാറോ വന്നെത്തണം !!

പുച്ച്ഛത്തോടെ എന്നെ നോക്കുന്നു - എന്ടെ രാജ്യം.